"Eva, sot erdhi pranë familjes! Mirënjohje të pafundme për çdo njeri që besoi tek Eva dhe për çdo njeri që ndihmoi që Eva të jetë sot pranë familjes!”. Kështu shkroi Xhetan Ndregjoni në rrjetin e tij social në FB, teksa lajmëroi se mbesa e tij Eva Dumani është riatdhesuar nga kampi famëkeq i Al Hol në Siri.
Eva Dumani, bashkë me vëllain Endrin, u morën nga babai i tyre në Siri, atje ku ai iu bashkua luftëtarëve të ISIS. Ai kishte mashtruar gruan e tij duke i marrë prokurë për të udhëtuar drejt Malit të Zi për pushime.
Babai i fëmijëve, Shkëlzen Dumani, humbi jetën gjatë luftimeve, ndërsa më vonë ndërroi jetë edhe gjyshja e fëmijëve, e cila udhëtoi drejt Sirisë për të sjellë në atdhe nipin e mbesën.
Endri Dumani u riatdhesua falë një operacioni të disa viteve më parë, ndërsa Eva mbeti te Al Hol. Me këmbënguljen e dajës së saj, Xhetan Ndregjoni, Eva ka prekur tokën shqiptare pas 12 vitesh.
