Reshjet e dendura të shiut gjatë orëve të fundit kanë shkaktuar problematika serioze në qytetin e Durrësit, duke vështirësuar qarkullimin në rrugët kryesore dhe shëtitoren “Taulantia”. Situata më e rënduar është regjistruar pranë Stadiumit “Niko Dovana”, ku uji ka kaluar mbi trotuare dhe rrugë, duke penguar lëvizjen e këmbësorëve dhe automjeteve.
Ndërsa në zonën e Currilës ka pasur rrëshkitje dherash duke bllokuar një sens të rrugës dhe duke vështirësuar qarkullimin e automjeteve.
Autoritetet lokale raportojnë se, edhe pse uji është tërhequr gradualisht pas ndërprerjes së reshjeve, priten sërish vështirësi në orët në vijim për shkak të parashikimeve për reshje të dendura dhe erëra të forta.
Reshjet intensive kanë krijuar situata emergjente edhe në jug të vendit, sidomos në qytetin e Himarës, ku përroi që kalon në mes të qytetit ka dalë nga shtrati. Kjo ka shkaktuar përmbytje të rrugëve dhe depërtim të ujit në ambientet e Komisariatit të Policisë Himarë, ku efektivët kanë ndërhyrë menjëherë për të mbrojtur pajisjet nga dëmtimi.
