SPAK ka konfirmuar zyrtarisht sot se Agim Ismaili po hetohet për një sërë veprash të rënda penale që lidhen me përgjime të paligjshme dhe aktivitet në kuadër të një grupi të strukturuar kriminal.
Në një njoftim zyrtar, Prokuroria e Posaçme bën me dije se Ismaili është marrë në pyetje këtë të mërkurë, më 13 nëntor 2025, në prani të avokatit të tij mbrojtës, ndërsa ndaj tij po zhvillohen hetime për tre akuza kryesore:
• Neni 293/a, paragrafi i dytë – Përgjimi i paligjshëm i të dhënave kompjuterike
• Neni 333/a – Pjesëmarrja në grup të strukturuar kriminal
• Neni 334 – Kryerja e veprave penale nga organizata kriminale ose grupi i strukturuar kriminal
Burime hetimore thonë se Ismaili dyshohet të ketë pasur rol qendror si “truri” i hakerimit të sistemeve të SPAK, një prej incidenteve më të rënda të sigurisë kibernetike të verifikuara ndonjëherë ndaj një institucioni të drejtësisë në vend.
Hetimet e SPAK pritet të thellohen në ditët në vijim, teksa autoritetet po verifikojnë shkallën e përfshirjes së tij dhe të personave të tjerë të mundshëm në këtë aktivitet të dyshuar kriminal.
