Detaje tronditëse kanë dalë në dritë nga atentati mafioz i ndodhur më 8 shtator në lokalin “Idromeno” në Shkodër, ku humbën jetën dy persona dhe dy të tjerë mbetën të plagosur. Emisioni “Në Shënjestër” ka publikuar pjesë nga dosja hetimore që zbardh rolin e Ragip Gilës, një personazh i njohur i botës së krimit në Shkodër, i cili vetëm pak muaj më parë ishte liruar nga burgu.
Autoritetet u vunë në ndjekje të autorit menjëherë pas atentatit, kur pranë vendit të ngjarjes u gjet një motoçikletë e zezë tip ‘Dayang’, pa targa dhe me numrin e shasisë të fshirë. Brenda pak orësh, forcat e policisë identifikuan Ragip Gilën si të dyshuarin kryesor. Ai u lokalizua pranë brigjeve të lumit Kir, në zonën e ish-magazinave të mallrave, ku ishte fshehur në bimësi të dendur pas dëmtimit të këmbës gjatë arratisjes.
Në çantën e tij u gjetën një palë atlete ‘Nike’, një shishe plastike me lëndë djegëse dhe dy armë zjarri – një automatik dhe një pistoletë. Në vendin ku u arrestua u gjet gjithashtu një automjet tip BMW i braktisur.
Ragip Gila, 26 vjeç, ishte arrestuar në fund të vitit 2023 në kuadër të operacionit “Imazhi Fals”, ku në banesën e tij u sekuestruan armë, municione dhe lëndë narkotike. Ai u dënua fillimisht me 5 vite burg, por dënimi iu ul në 1/3 dhe më pas u konvertua në shërbim prove, duke u liruar më 4 mars 2025 në bazë të nenit 59 të Kodit Penal.
Por përgjimet ambientale të kryera në ambientet e Komisariatit të Shkodrës zbulojnë një anë tjetër të errët të Gilës. Gjatë një bisede me vëllain e tij, ai shpreh kërcënime të hapura dhe një vetëdije të qartë për aktivitetin kriminal:
Ragip Gila: “Kur të dalësh, ruji fëmijët, mos i ço në shkollë njëherë. Nuk të majn ty, ti rri i qetë. Nuk ke punë ti!”
Kjo deklaratë tronditëse pasqyron jo vetëm brutalitetin e autorit, por edhe rrezikun që ai paraqiste për komunitetin, pavarësisht vendimit për ta lënë në liri me kusht.
Lirimi i Gilës dhe rikthimi i tij në skenën e krimit kanë ngritur shqetësime serioze mbi vendimet gjyqësore dhe zbatimin e masave alternative ndaj të dënuarve të rrezikshëm. Rasti ka sjellë në vëmendje edhe njëherë dështimet e sistemit të drejtësisë për të parandaluar rikthimin në krim të individëve me precedentë të rrezikshëm penalë.
Hetimet për ngjarjen vijojnë, ndërsa qyteti i Shkodrës mbetet ende nën tronditjen e kësaj ngjarjeje të rëndë, që riktheu frikën dhe pasigurinë në rrugët e tij.
