“Pse të kalosh ti i pari dhe jo unë”, ka qenë shkaku i sherrit mes dy nxënësve në shkollën 9-vjeçare në Sarandë.
Mësohet se në orët e para të mëngjesit të sotëm, 13-vjeçari, Santiago Gerdhuqi, dhe 15-vjeçari i lënduar, Rajan Haderi, janë konfliktuar në oborrin e shkollës jopublike ‘Dea’.
Fillimisht sherri ka nisur me fjalë, pastaj 13-vjeçari ka nxjerrë thikën dhe ka qëlluar 15-vjeçarin në pjesën e qafës.
I lënduari ndodhet jashtë rrezikut për jetën. Sakaq mësohet se 13-vjeçari nuk është kapur ende nga policia.
Kujtojmë se ky është rasti i radhës në pak javë ku nxënës të shkollave bëjnë sherre me mjete prerëse. Para një jave ndërroi jetë 15-vjeçari Erjon Boba në Durrës, pasi u godit me thikë nga një tjetër bashkëmoshatar. Më herët, Martin Cani u vra me thikë te Shkolla Fan Noli ndërsa miku i tij u plagos.
Duket se institucionet e shtetit ende nuk po zgjohen për t'iu përgjigjur këtij fenomeni që po përhapet në të gjithë shkollat e Shqipërisë.
