Unioni i Sindikatave ka organizuar një protestë përpara Ministrisë së Ekonomisë me rastin e 1 Majit, Ditës Ndërkombëtare të Punëtorëve.
Me pankarta me mesazhe si “Jeta e punëtorit nuk është kosto biznesi” dhe “Pagë për të jetuar, jo për të mbijetuar”, qytetarë dhe përfaqësues sindikalë kanë kërkuar përmirësim të kushteve të punës dhe rritje të të drejtave të punëtorëve. Në protestë është vënë re pjesëmarrje e kufizuar, si dhe mungesa e të rinjve.
Pjesëmarrësit kanë kërkuar, ndër të tjera, krijimin e një ministrie të posaçme për punën dhe miratimin e një minimumi jetik dinjitoz.
Drejtori i Unionit të Sindikatave të Shqipërisë, Kondi Lija, deklaroi se 1 Maji nuk duhet të shihet si festë, por si një ditë proteste dhe kërkese për të drejta më të mira në punë. Ai ngriti shqetësimin për rritjen e aksidenteve dhe humbjeve të jetës në vendin e punës, duke theksuar se sipas tij, numri i vdekjeve në punë është rritur me 45% krahasuar me një vit më parë, ndërsa aksidentet janë dyfishuar. Lija kritikoi mungesën e kontrolleve efektive institucionale dhe kërkoi ndërhyrje urgjente, përfshirë miratimin e minimumit jetik në Kuvend.
Ndërkohë, një tjetër protestë po zhvillohet përpara Kryeministrisë, e organizuar nga Konfederata e Sindikatave të Shqipërisë.
