Banorët e Rrjollit protestuan këtë të hënë para Kuvendit, duke kundërshtuar atë që e cilësojnë si cenim të të drejtës së pronës. Me pankarta në duar dhe thirrje publike për reagim nga institucionet, ata kërkuan më shumë transparencë dhe mbrojtje të pasurive të tyre.
Protestuesit u shprehën se nuk do të heqin dorë nga toka, të cilën e konsiderojnë burimin e vetëm të jetesës. “Po na vjedhin tokën”, ishte një nga mesazhet kryesore, ndërsa një qytetare ngriti shqetësimin për funksionimin e institucioneve, duke vënë në pikëpyetje deklaratat e Kryeministrit mbi dokumentacionin e pronave.
Banorët akuzuan se projektet zhvillimore po realizohen pa transparencë dhe në dëm të tyre, duke i cilësuar si “grabitje në mes të ditës”. Ata hodhën akuza edhe ndaj ish-zëvendëskryeministres Belinda Balluku, duke kërkuar hetim nga organet e drejtësisë dhe duke theksuar mungesën e drejtësisë në rastet e tyre.
Në protestë u bashkuan edhe banorë nga Durrësi, të cilët kundërshtojnë projektin TID. Në pankartat e tyre, ata e cilësuan projektin e AADF si korruptiv dhe kërkuan ndalimin e menjëhershëm të tij.
