Një granatë dore e pashpërthyer u gjet pasditen e sotme në taracën e një ndërtese që përdoret si shtëpi funerali në fshatin Kameras, pranë aksit Fushë-Krujë – Krujë. Zbulimi u bë nga pronari i godinës, Arber Sala, i cili gjatë vendosjes së disa shkronjave reklamuese në çati, vuri re objektin e dyshimtë dhe menjëherë njoftoi policinë.
Në vendngjarje mbërritën forcat e rendit, të cilat kërkuan ndihmën e xhenierëve të RENEA-s për çmontimin dhe neutralizimin e granatës. Burime lokale tregojnë se Arber Sala nuk ka probleme me ligjin dhe prej vitesh merret me shërbime funerale. Pak kohë më parë, ai ishte viktimë e një zjarrvënieje ku iu dogj një magazinë e vjetër, ndërsa ndërtesa ku u gjet granata është ndërtuar së fundmi.
Policia ka nisur hetimet për të zbuluar shkaqet dhe rrethanat e vendosjes së granatës dhe po shqyrton mundësinë e një akti të qëllimshëm.
