Prokuroria e Përgjithshme nuk e ka deklaruar se vendimi i autoriteteve greke për Irena Gjokën është autentik. Rezulton që gjyqtarja e posacme është dënuar nga drejtësia greke në 2005 për falsifikim vize dhe këtë fakt e ka deklaruar në formularin e dekriminalizimit. Por sipas prokurorisë i takon Këshillit të Lartë Gjyqësor të vendosë nëse Irena Gjoka duhet ose jo ta vijojë detyrën.
Ndërkohë SPAK që ka çelur hetimet për rastin tha se çështja është në hetim paraprak dhe s’mund të japë detaje.
“Në përgjigje të kërkesës suaj, çështja është në fazën e hetimeve paraprake. Bazuar në nenet 103 dhe 279 të Kodit të Procedurës Penale, veprimet hetimore që kryhen në fazën e hetimit paraprak përbëjnë sekret hetimor. Duke iu referuar këtyre neneve, nuk mund të bëjmë me dije veprimet hetimore apo rezultatet e tyre”, thuhet në reagimin e SPAK.
