Prokuroria e Elbasanit ka sqaruar se pas shqyrtimit të materialeve procedurale për ndalimin e avokatit Ulian Bajrami, është konstatuar se nuk ekzistonin kushtet për vijimin e ndalimit, ndaj është urdhëruar lirimi i menjëhershëm i tij.
Sipas njoftimit zyrtar, avokati ishte ndaluar pas një incidenti gjatë seancës gjyqësore të 17 tetorit, ku dyshohej se kishte kanosur prokurorin e çështjes dhe punonjës të policisë gjyqësore gjatë procesit për vlerësimin e arrestimeve të 14 personave.
Prokuroria ka regjistruar procedimin penal nr. 1222/2025 për tre vepra penale: “Kanosje për shkak të detyrës”, “Kanosje e gjyqtarit” dhe “Kundërshtim dhe goditje e gjyqtarit”, me qëllim vijimin e hetimeve për sqarimin e plotë të rrethanave.
Në reagimin e saj, Prokuroria thekson se gjyqtarët, prokurorët, policia gjyqësore dhe avokatët janë shtylla të sistemit të drejtësisë, të cilat duhet të funksionojnë me respekt reciprok dhe integritet profesional, ndërsa qëndrimet e nxituara apo justifikimi i sjelljeve të kundërligjshme dëmtojnë besimin dhe funksionimin e drejtësisë.
