Policia e Vlorës ka dalë me një njoftim zyrtar lidhur me vdekjen e shtetasit Artjon Isa Xhelo, i cili u gjet i pajetë dhe i djegur brenda një automjeti në zonën e quajtur “Qafa e Llogarasë”, ngjarje e ndodhur sot, më 15 dhjetor 2025.
Rreth orës 14:00, shërbimet e Policisë janë njoftuar se një automjet ishte përfshirë nga flakët. Menjëherë pas marrjes së njoftimit, forcat policore kanë shkuar në vendngjarje, ku kanë konstatuar se një automjet tip BMW, me targa AA 169 YX, ishte djegur plotësisht.
Nën drejtimin e Prokurorisë është ngritur grupi hetimor dhe janë kryer veprimet e para hetimore. Gjatë këqyrjes së automjetit, në sediljen e drejtuesit është gjetur trupi i pajetë i shtetasit Artjon Isa Xhelo.
Nga verifikimet paraprake të automjetit dhe trupit të pajetë nuk janë konstatuar shenja të dukshme dhune apo dëmtime të shkaktuara nga faktorë të jashtëm, përveç atyre të shkaktuara nga zjarri.
Sipas deklarimeve të familjarëve, shtetasi rreth orës 11:00 kishte dalë nga banesa e tij në Berat me automjetin në fjalë, pa bërë me dije destinacionin. Po sipas familjarëve, ai vuante prej rreth tre vitesh nga ankthi dhe depresioni dhe ishte në trajtim mjekësor.
Trupi i pajetë është dërguar në morgun e Spitalit Rajonal Vlorë, ku për identifikimin përfundimtar pritet përgjigjja e analizave biologjike (ADN).
Nga hetimet e deritanishme dyshohet se ngjarja është një rast vetëvrasjeje, ndërsa, nën drejtimin e Prokurorisë, vijon puna hetimore për sqarimin e plotë të rrethanave dhe dinamikës së ngjarjes.
