Policia e Durrësit tha detaje lidhur me arrestimin e ish-Kryeinspektorit të IMT-së në Bashkinë Durrës Ardian Halili, i cili ndonëse kishte detyrë të parandalonte ndërtimet pa leje, ndërtoi vetë një resort luksoz: kuptohet pa leje ndërtimi.
“Gjatë verifikimeve të kryera nga shërbimet e Policisë dhe ato të IKMT-së, ky shtetas u kap duke kryer punime ndërtimi pa leje në subjektin e tij “Sent Michele Rezidencë”. Ardian Halili e ka ndërtuar këtë objekt, i cili përbëhet nga 11 kabina tip garsoniere, një godinë 2-katëshe, një fushë minifutbolli dhe një pishinë, në një sipërfaqe toke prej 5,600 m², gjatë kohës kur ai ka ushtruar funksionin e Kryeinspektorit të IMT-së në Bashkinë Durrës dhe konkretisht gjatë viteve 2018-2021.
Nga verifikimet e kryera rezultoi se ndërtimi i këtij objekti pa leje ka filluar prej vitit 2018 e në vijim”, deklaroi Vilson Bala, drejtor i policisë së Durrësit.
Halili është referuar në prokurori për akuzat “Ndërtim i paligjshëm me qëllim përfitimi”, “Korrupsion i zyrtarëve të lartë” dhe “Shpërdorim i detyrës”.
“Ky rast është dëshmia më e qartë sesi zyrtarë të shtetit, duke shpërdoruar detyrën shtetërore, kanë abuzuar me qëllim përfitimin, në këtë rast të ndërtimit në kundërshtim me çdo ligj e rregull”, theksoi Bala, ndërsa ftoi qytetarët të denoncojnë çdo paligjshmëri.
