Një 41-vjeçar ka plagosur me armë zjarri kunatin e tij, gjatë një konflikti që dyshohet se ka ndodhur për motive të dobëta në Kombinat, Tiranë. Policia ka reaguar me shpejtësi duke arrestuar autorin e dyshuar, ndërsa një tjetër person është shpallur në kërkim.
Ngjarja ndodhi rreth orës 15:40, në banesën e të dëmtuarit në rrugën “Llambi Bonata”. Sipas Policisë, M. T., rreth 41 vjeç, dyshohet se ka qëlluar me armë zjarri kunatin e tij, G. M., 56 vjeç, i cili ndodhet në spital dhe është jashtë rrezikut për jetën.
Në njoftimin zyrtar, Policia e Tiranës bën me dije se falë reagimit të menjëhershëm dhe ndërhyrjes profesionale të shërbimeve të Komisariatit Nr. 6, është bërë e mundur kapja dhe shoqërimi i autorit në ambientet e Policisë për veprime të mëtejshme hetimore.
Gjatë operacionit është sekuestroar arma e zjarrit me të cilën u krye plagosja.
Ndërkohë, është shpallur në kërkim një 29-vjeçar, N. S., i cili dyshohet se ka qenë prezent në banesë në momentin e ngjarjes dhe është larguar menjëherë pas saj. Policia po vijon punën për lokalizimin dhe kapjen e tij.
Grupi hetimor ndodhet në vendngjarje dhe po punon për të sqaruar rrethanat dhe për të dokumentuar plotësisht motivet dhe dinamikën e ngjarjes.
