Gjykata e Dibrës cakton masën “Shtrimi i përkohshëm në një spital psikiatrik”, për të riun që plagosi 7 herë me thikë nënën e tij, Nexhmie Sula. Gjatë seancës ai ka rezultuar se ka probleme psikike dhe për këtë arsye është dërguar përkohësisht në psikiatri. Nëna e tij, drejtoreshë shkolle në Pocest, Maqellarë, ndodhet në Spitalin e Traumës nën kujdesin e mjekëve.
Dispozitivi i gjykatës
Lidhur me çështjen penale Nr. 62 Akti datë regjistrimi 04.08.2025 me objekt: “Vlerësimin si të ligjshëm të arrestit në flagrancë të personit nën hetim H.S.”, akuzuar për kryerjen e veprës penale “Plagosje e rëndë me dashje” parashikuar nga neni 88/2 i Kodit Penal.
Gjykata, në përfundim të shqyrtimit, me Vendimin nr. 62, datë 05.08.2025:
VENDOSI:
Pranimin e kërkesës.
Vlerësimin si të ligjshëm të arrestit në flagrancë të personit nën hetim H.S. (i biri i B. dhe N., i datëlindjes xx.10.1999), i dyshuar për kryerjen e veprës penale “Plagosje e rëndë me dashje” parashikuar nga neni 88/2 i Kodit Penal.
Caktimin e masës së sigurimit personal “Shtrimi i përkohshëm në një spital psikiatrik”, parashikuar nga neni 239 i Kodit të Procedurës Penale, ndaj personit nën hetim H.S., i dyshuar për kryerjen e veprës penale “Plagosje e rëndë me dashje” parashikuar nga neni 88/2 i Kodit Penal.
Ngarkohet Prokuroria pranë Gjykatës së Shkallës së Parë të Juridiksionit të Përgjithshëm Dibër për ekzekutimin e këtij vendimi.
Shpenzimet gjyqësore siç janë bërë.
Kundër këtij vendimi lejohet ankim në Gjykatën e Apelit të Juridiksionit të Përgjithshëm, brenda 5 (pesë) ditëve, duke filluar ky afat nga dita e nesërme e njoftimit të arsyetuar të tij.
U shpall në Peshkopi, sot më datë 05.08.2025.
