Banorët e Durrësit kanë dalë edhe këtë të premte në protestë për shkak të situatës së rëndë të krijuar nga përmbytjet e shkaktuara nga reshjet e dendura të shiut. Protesta u zhvillua para Bashkisë së Durrësit, ku qytetarët kanë shprehur pakënaqësinë për mungesën e mbështetjes dhe reagimit nga ana e institucioneve.
Sipas protestuesve, përmbytjet kanë paralizuar qytetin dhe janë pasojë e mungesës së përgjegjësisë dhe angazhimit të autoriteteve për pastrimin në kohë të kanaleve kulluese. Ata kërkojnë përgjegjësi nga institucionet shtetërore dhe dëmshpërblim për dëmet e shkaktuara.
“E drejta e dëmshpërblimit u takon të gjithëve, mos veproni në kurriz të njëri-tjetrit”, tha një protestuese gjatë zhvillimit të tubimit.
Gjatë protestës pati tensione me forcat e rendit pranë bashkisë. Disa protestues hodhën mjete piroteknike për të shprehur pakënaqësinë e tyre, ndërsa disa prej tyre tentuan të futen në ambientet e institucionit. Mësohet se një person u shoqërua nga policia për hedhjen e fishekzjarreve.
