Gjykata e Shkallës së Parë ka vendosur caktimin e masës së sigurisë “detyrim paraqitje” për dy të rinjtë Klevin Thepi, 24 vjeç, dhe Doronesto Kulla, 19 vjeç, që dyshohet se janë organizatorët e përleshjes masive mes adoleshentëve në qytetin e Shkodrës, pranë shkollës së mesme “Shejnaze Juka”.
Sipas Policisë, në konflikt u përfshinë rreth 15 të rinj, të ndarë në dy grupe, kryesisht të moshës 17–18 vjeç. Fillimisht përplasja nisi me grushte, për t’u përshkallëzuar më pas me përdorimin e sendeve të forta, ndërsa dyshohet se gjatë ngjarjes është përdorur edhe sende të forta dhe thika. Si pasojë, tre adoleshentë pësuan dëmtime të lehta dhe u transportuan në spitalin rajonal të Shkodrës, ku morën ndihmën mjekësore dhe ndodhen jashtë rrezikut për jetën.
Hetimet paraprake tregojnë se konflikti ka pasur zanafillë një përplasje të mëparshme mes nxënësve. Dyshohet se 19-vjeçari Doronesto Kulla është përfshirë në ngjarje për t’i ardhur në ndihmë vëllait të tij, një 17-vjeçar, nxënës i shkollës “Shejnaze Juka”. Pamjet filmike të administruara nga organet hetimore tregojnë momentin e bashkimit të dy grupeve dhe nisjen e përleshjes fizike, e cila ka zgjatur rreth një minutë.
Menjëherë pas ngjarjes, shërbimet e Policisë së Shkodrës, në bashkëpunim me njësinë “Shqiponja”, ndërhynë në vendngjarje, duke sekuestruar pamjet e kamerave të sigurisë dhe duke nisur hetimet. Fillimisht, dy të rinjtë u arrestuan si të dyshuar për organizimin e konfliktit, ndërsa për pesë shtetas të mitur (katër 17-vjeçarë dhe një 16-vjeçar) u nis procedimi penal në gjendje të lirë.
Ndërkohë, specialistët e Seksionit për Hetimin e Narkotikëve referuan materiale në Prokurori për një prej 17-vjeçarëve të përfshirë, pasi gjatë kontrollit fizik iu gjet dhe iu sekuestrua një sasi e vogël lënde e dyshuar narkotike, e llojit kanabis. Policia ka identifikuar edhe persona të tjerë të përfshirë në konflikt dhe vijon hetimet për dokumentimin e plotë ligjor të kësaj ngjarjeje, ndërsa shkaqet e sakta të përleshjes mbeten ende të paqarta dhe dyshohet se lidhen me motive të dobëta.
