Janë zbardhur detaje të reja nga ngjarja e rëndë e ndodhur në orët e para të mëngjesit në Manëz të Durrësit, ku dy persona mbetën të vrarë me armë zjarri.
Sipas burimeve nga grupi hetimor, ngjarja nisi pas një konflikti në një lokal mes Daniel Pepës, Arianit Kurtit dhe Florit Paluçit. Mësohet se Pepa i ka kërkuar kamarierit t’i bënte një kafe, por ky i fundit i është përgjigjur se ekspresi ishte i fikur. Pas insistimeve dhe fyerjeve nga ana e Pepës, ka ndërhyrë Flori Paluçi, duke i kërkuar që të mos ofendonte kamarierin që ndodhej në tavolinë me të.
Debati verbal është përshkallëzuar shpejt në përdorim armësh. Sipas dinamikës paraprake, i pari që ka qëlluar ka qenë Flori Paluçi, i cili vrau Arianit Kurtin. Më pas, Daniel Pepa ka reaguar duke qëlluar ndaj Paluçit, duke e lënë atë të vdekur në vend.
Policia dhe prokuroria vijojnë hetimet për zbardhjen e plotë të rrethanave të ngjarjes.
