SPAK ka ushtruar dje kontroll në katër banesa në pronësi apo përdorim të Ergys Agasit, të konsideruar si kreu i një grupi kriminal që mori peng biznesmenin Gerond Mece për ta detyruar të tërhiqej nga ankesat për tenderat e AKSHIT, tendera që më pas fitoheshin nga kompanitë e Ermal Beqirit. “Gjatë kontrolleve kemi sekuestruar materiale që kanë interes për hetimin”, tha një burim pranë BKH-së. I njëjti burim konfirmoi se pajisjet e sekuestruara në banesat e Agasit do të zbërthehen nga ekspertët. Po ashtu po ekspertohen celularët që iu janë sekuestruar disa biznesmenëve dhe anëtarëve të KPP gjatë ditës së djeshme.
SPAK goditi një grup kriminal me në krye biznesmenët Ergys Agasi dhe Ermal Beqiri, të cilët janë shpallur në kërkim për akuzat e “konkurrencës së paligjshme përmes dhunës”, “heqje e paligjshme e lirisë”, “grupit kriminal” apo “pastrimit të parave” etj.
Në arrest shtëpie është dërguar drejtoresha e AKSHI-t Mirlinda Karcanaj dhe zëvendësja e tij, ndërsa u është ndaluar e drejta për të dalë jashtë vendit 3 biznesmenëve të tjerë, si dhe është pezulluar nga ushtrimi i detyrës dhe i është ndaluar e drejta për të dalë jashtë vendit, zv.drejtorit për hetimin e krimit në Policinë e Tiranës, Erion Ismaili.
