Vetëm dy ditë pas një ngjarjeje tragjike, dy aksidente të tjera janë regjistruar në aksin rrugor Spitallë–Porto Romano, duke rritur shqetësimin për sigurinë në këtë zonë.
Një prej aksidenteve ka ndodhur në zonën e Spitallës, në lagjen 15. Sipas informacioneve paraprake, në ngjarje është përfshirë një automjet tip “Ford” me ngjyrë të bardhë, i drejtuar nga një i ri, ndërsa në të udhëtonte edhe babai i tij i moshuar.
Mjeti ka humbur kontrollin, ka përplasur disa automjete të parkuara anës rrugës dhe më pas është përmbysur, duke shkaktuar dëme të konsiderueshme materiale.
Dy personat që ndodheshin në automjet janë transportuar menjëherë në spital. Fatmirësisht, i moshuari ndodhet jashtë rrezikut për jetën dhe në gjendje të qëndrueshme shëndetësore.
Paraprakisht dyshohet se shkak i aksidentit mund të ketë qenë lodhja apo pagjumësia e drejtuesit të mjetit.
Ndërkohë, një tjetër aksident është regjistruar po në të njëjtin aks rrugor, duke shtuar më tej shqetësimin e banorëve për mungesën e sigurisë dhe kushtet e papërshtatshme të qarkullimit.
