Pas rrëzimit të kërkesës së Fatmir Mediut dhe avokatëve të tij për përjashtimin e gjyqtares Irena Gjoka nga çështja “Gërdeci”, tashmë është vetë gjyqtarja që kërkon të tërhiqet nga procesi. Më 11 nëntor, Gjoka i është drejtuar nënkryetarit të GJKKO-së, Erion Bani, duke paraqitur kërkesën për largim nga trupa gjykuese.
Në argumentimin e saj, gjyqtarja shprehet se ndodhet në kushte papajtueshmërie, pasi ka qenë pjesë e seancës paraprake të kësaj çështjeje dhe mori në shqyrtim kërkesën fillestare të të pandehurit për gjykim të shkurtuar. Pas ndryshimit të qëndrimit nga ana e Mediut dhe kalimit në procedurë të zakonshme, procesi ka vijuar për më shumë se një vit.
E pyetur nga avokatët e Mediut gjatë seancës së djeshme, Gjoka sqaroi se vendimi për t’u larguar lidhet pjesërisht edhe me kërkesën e mëparshme të mbrojtjes për përjashtimin e saj, e cila ishte rrëzuar nga gjyqtarja Etleva Deda, por për arsye të tjera. Tashmë, pritet që mbi këtë kërkesë të shprehet drejtuesi i GJKKO-së, Erion Bani.
Ndërkohë, seanca e djeshme vijoi me kundërshtimet e Mediut ndaj deklarimeve të ekspertëve. Procesi ndodhet në fazën përfundimtare të paraqitjes së provave nga SPAK dhe pritet të nisë dëgjimi i dëshmitarëve të kërkuar nga mbrojtja.
