"Hakmarrja" e Erion Veliajt ndaj prokurorit të posaçëm, Olsi Dado, ka përfunduar në dyert e gjykatave. Gjykata Administrative ka njoftuar se do të shqyrtojë nesër, në orën 13:00, kërkesëpadinë e kryebashkiakut të Tiranës për pavlefshmërinë e emërimit të Ols Dados si prokuror.
Madje, Erion Veliaj, i cili nuk është paraqitur në seancat e tij gjyqësore në GJKKO me argumentin se po lexon rreth 300 faqe në ditë nga dosja e tij, duket se nesër do ta ndërpresë këtë proces për t’u paraqitur personalisht në Gjykatën Administrative.
Përmes kërkesëpadisë, ai kërkon konstatimin e pavlefshmërisë absolute të Dekretit të Presidentit të Republikës nr. 5936, datë 17.11.2008, për emërimin e z. Ols Dado në detyrën e prokurorit të Republikës së Shqipërisë. Çështja në Gjykatën Administrative po shqyrtohet nga gjyqtari Hazbi Balliu.
Ols Dado është prokurori i posaçëm që e hetoi dhe e mori të pandehur Erion Veliajn për 13 akuza penale. Që nga momenti kur firmosi arrestimin e kryebashkiakut, prokurori në fjalë është kthyer në një “tabelë qitjeje” nga media pranë Veliajt, me shkrime që e sulmojnë, e fyejnë dhe analizojnë në detaje karrierën e tij, ndërsa së fundmi vihet në pikëpyetje edhe mënyra e emërimit të tij disa vite më parë.
