Pas arratisjes së Altin Ndocit nga spitali i burgut mesditën e djeshme, autoritetet kanë nisur transferimin e personave me rrezikshmëri të lartë nga burgu i Durrësit drejt burgut të sigurisë së lartë në Fier.
Burgu i Durrësit nuk klasifikohet si institucion i sigurisë së lartë, ndaj është vendosur që të dënuarit me rrezikshmëri të shtuar të mos qëndrojnë më aty. Transferimet përfshijnë vetëm këtë kategori dhe jo zyrtarët e arrestuar.
Altin Ndoci u arratis nga spitali i burgut ku ishte dërguar për trajtim mjekësor, pasi kishte shfaqur ankesa për dhimbje në veshka. Ndërkohë, edhe pas më shumë se 24 orësh nga arratisja, ai ende nuk është kapur, pavarësisht kontrolleve intensive dhe postoblloqeve të ngritura nga policia.
Në lidhje me këtë ngjarje, tetë persona janë arrestuar, mes tyre personel shëndetësor dhe efektivë policie, të dyshuar për përfshirje ose neglizhencë në rastin e arratisjes. Hetimet vijojnë për të zbardhur plotësisht rrethanat e ngjarjes.
