Gjykata e Posaçme ka shtyrë edhe një herë seancën gjyqësore ndaj kreut të PD-së, Sali Berisha, dhëndrit të tij Jamarbër Malltezi, si dhe të pandehurve Fatmir Bektashi, Xhimi Begeja dhe Andia Pustina. Arsyeja e shtyrjes lidhet me mungesën e avokatit Sokol Hazizaj, mbrojtës i Bektashit. Seanca e radhës është caktuar për 10 dhjetor, në orën 12:30.
Berisha vijon të hetohet në kuadër të dosjes “Partizani”, ku SPAK e akuzon se ka kryer ndryshime ligjore në favor të dhëndrit të tij, duke i hapur rrugë ndërtimit të një biznesi nga i cili Malltezi përfitoi rreth 5.4 milionë euro.
Përveç Berishës dhe Malltezit, të pandehur janë edhe bashkëpunëtorët e tyre: biznesmeni Fatmir Bektashi, i akuzuar për “korrupsion aktiv” dhe “pastrim parash”, si dhe ortakët e Malltezit, mes tyre Xhimi Begeja, të cilit i është komunikuar gjithashtu akuza për “pastrim parash”.
Të pandehurit:
-Sali Berisha, ish kryeministër – akuzohet për “Korrupsionit pasiv të funksionarëve të lartë shtetërore ose të zgjedhurve vendorë”, kryer në bashkëpunim, me Jamarbër Malltezin parashikuar nga neni 260 e 25 i Kodit Penal.
-Jamarbër Malltezi – dhëndri i ish-kryeministrit – akuzohet për “Korrupsioni pasiv të funksionarëve të lartë shtetërore ose të zgjedhurve vendorë”, kryer në bashkëpunim me Sali Berishën pasi në marrëveshje me këtë të fundit, duke shfrytëzuar pushtetin e ish Kryeministrit, ka arritur të marrë përfitimet e parregullta! Akuzohet dhe për “Pastrimit të produkteve të veprës penale ose veprimtarisë kriminale”, parashikuar nga neni 287 paragrafi i dytë i Kodit Penal
-Fatmir Bektashi – Ndërtuesi akuzohet “Korrupsionit aktiv të funksionarëve të lartë shtetërorë”, parashikuar nga neni 245 i Kodit Penal dhe ‘pastrim parash’
-Xhimi Begeja- Ortaku i Malltezit, trashëgimtar i tokës dhe bashkëpronar i ‘Homeplan’ akuzohet për ‘Pastrim Parash’
-Andia Pustina – Financierja që kryente të gjitha operacionet financiare dhe ligjore të Homeplan sh.p.k – Akuzohet për ‘Pastrim Parash’
