Laboratori shkencor në Policinë e Shtetit pritet të bëjë ekspertizën e pajisjeve përgjuese që u bllokuan pak ditë më parë në Portin e Durrësit. Burime nga Prokuroria e Durrësit thanë se prokurori Sokol Nishani ka marrë vendim për kryerjen e ekspertizës, prej nga do të konfirmohet nëse janë kryer ose jo përgjime të paligjshme.
Pajisjet u bllokuan ditë më parë në port, teksa dy oficerë të Guardia di Finanza dhe një shtetas i tretë po largoheshin nga Shqipëria. Prokuroria e Durrësit po heton për veprën penale “përgjim i paligjshëm”, ndërsa do të kërkojë, përmes letërporosisë, informacion për tre shtetasit që transportonin pajisjet.
Paraprakisht ka dyshime të forta se me pajisjet e bllokuara janë përgjuar eksponentë të caktuar, të cilët ishin nën hetim nga Guardia di Finanza. Por shkelja e kryer në rastin konkret, nga personat që u lejuan të largoheshin pas marrjes në pyetje, është fakti se nuk ka pasur një autorizim nga autoritetet shqiptare për përdorimin e pajisjeve në fjalë. Burimet konfirmojnë se pajisjet kryejnë përgjime ambientale dhe telefonike.
