Policia e Shtetit ka finalizuar fazën e 14-të të operacionit policor të koduar “Storm”, në kuadër të goditjes së prostitucionit. Operacioni u zhvillua nga Seksioni për Hetimin e Trafiqeve, me mbështetjen e Forcës së Posaçme Operacionale, pas një hetimi dyjavor të ndjekur me metoda speciale.
Si rezultat, u proceduan në gjendje të lirë shtetaset Th. C., 35 vjeçe, dhe A. F., 39 vjeçe, lindur në Brazil, për veprat penale “Prostitucion” dhe “Përshtatja e ambienteve për prostitucion”. Po ashtu, për veprën penale “Prostitucioni” u proceduan në gjendje të lirë edhe dy shtetas, E. D. dhe S. A., banues në Durrës.
Gjatë operacionit, policia sekuestroi në cilësinë e provës materiale 1 080 euro, 116 700 lekë, 120 dollarë amerikanë, 80 paund britanikë, 150 franga dhe 3 430 dinarë, si dhe dy pasaporta të shtetaseve të huaja, 8 aparate celularë, karta telefoni dhe blloqe shënimesh.
Nga veprimet hetimore rezultoi se shtetaset e proceduara kishin marrë me qira një apartament në zonën e Vollgës, lagjja nr. 1, Durrës, të cilin e kishin përshtatur për ushtrimin e aktivitetit të prostitucionit. Hetimet vijojnë për dokumentimin e plotë të kësaj veprimtarie të paligjshme.
