Pas proceseve të njohura “Costa” dhe “Samba”, në Belgjikë po nis një tjetër gjyq i madh për drogë – i quajtur “Kookwas”. Të martën, para gjykatës së Dendermonde do të dalin 23 të pandehur, të akuzuar për trafik ndërkombëtar të kokainës. Në krye të këtij rrjeti, sipas hetimeve, qëndrojnë dy emra kryesorë: pronari i "Cinco cavalli" Ermir Ndreaj, i njohur me nofkën “Cinco” dhe boshnjaku Sani A.M., i njohur si “Shade”.
Gjithçka nisi në Krishtlindje
Historia e këtij rrjeti u zbulua rastësisht më 24 dhjetor 2020, në vigjilje të Krishtlindjes. Një shofer kamioni nga Holanda kishte shkuar në Temse dhe Beveren për të marrë një ngarkesë. Kushtet i dukeshin të çuditshme, ndaj vendosi të kontrollonte çfarë kishte në kamion sapo u kthye në Holandë. Aty zbuloi se ngarkesa ishte e përbërë nga 12.000 litra mbetje kimike që vinin nga përpunimi i kokainës.
Në të njëjtën ditë, nga Kolumbia erdhi një tjetër lajm: policia atje kishte kapur 357 kilogramë kokainë, të fshehur mes një ngarkese me oksid hekuri që ishte destinuar për një firmë në Beveren – pikërisht tek i njëjti adresë nga ku ishte nisur edhe mbetja e drogës. Kjo përputhje vuri hetuesit belgë në alarm dhe u bë pika e nisjes së hetimit.
Thyerja e Sky ECC
Përparimi vendimtar ndodhi në mars 2021, kur policia arriti të zbërthente mesazhet e aplikacionit të krimit të organizuar Sky ECC. Mesazhet tregonin se drejtues i rrjetit ishte boshnjaku Sani “Shade” A.M., një figurë e njohur e klan Skaljari nga Ballkani, i cili vetë organizonte transportet e kokainës nga Amerika Latine në Evropë.
Krahu i tij i djathtë ishte edhe Ermir Ndreaj, një tjetër emër i madh në tregtinë e kokainës. Të dy kishin ngritur kompani të rreme për të fshehur aktivitetin e tyre, ndërsa mënyra e tyre e veçantë e kontrabandës ishte “mezclado”: kokaina fshihej duke u përzier në produkte si katran, çimento, pigmente ngjyrash e madje edhe në konserva toni. Kjo e bënte shumë më të vështirë zbulimin nga autoritetet, por kishte një problem tjetër – droga duhej nxjerrë përsëri nga këto produkte në Evropë, nëpërmjet të ashtuquajturave lavanderi të kokainës, ku përdoreshin sasi të mëdha kimikatesh dhe krijoheshin mbetje toksike.
Dyshimet për Oosterweel
Në dhjetor 2020, rrjeti mbylli laboratorin e tij në Charleroi, por mbetën me 20 ton mbetje kimike për t’u hequr qafe. Në mesazhet e Sky ECC, njëri nga anëtarët, Ronaldo V.M., i shkruante Ermir Ndreajt:
“Dy fundjava dhe gjithçka mbaron. Ai njeriu i Besix-it e di dhe do t’i hedhë të gjitha me eskavator në gropë.” Prokuroria beson se një pjesë e mbetjeve u përzien me inerte ndërtimi dhe u hodhën fshehurazi në punimet e Oosterweel në Antwerp. Pjesa tjetër do të përpunohej në Holandë, por plani dështoi kur shoferi holandez zbuloi ngarkesën e dyshimtë.
Procesi dhe pritshmëritë
As A.M. dhe as Ermir Ndreaj nuk do të jenë të pranishëm në sallën e gjyqit, pasi të dy ndodhen në arrati. Hetuesit besojnë se rrjeti i tyre ka trafikuar mbi 10 ton kokainë drejt Evropës.
Mbetet për t’u parë nëse ky proces do të zhvillohet pa incidente. Kujtojmë se proceset e mëparshme të ngjashme, “Samba” dhe “Costa”, u shoqëruan me tensione të mëdha. Edhe në këtë rast, mbrojtjen e të pandehurve e marrin përsipër të njëjtët avokatë si në ato dy dosje të mëdha.
