Vetëm një ditë zgjati gëzimi i uljes së çmimeve të naftës dhe benzinës. Me të gdhirë sot, Bordi i Transparencës u mblodh sërish dhe vendosi të rrisë çmimin e naftës me 15 lekë dhe të benzinës me 6 lekë për tregun e pakicës, duke treguar se uljet e çmimeve zgjasin ndonjëherë më pak se një ditë.
Nga 203 lekë, çmimi i naftës shkoi në 218 lekë për litër, ndërsa benzina nga 175 lekë arriti në 181 lekë për litër. Çmimet me shumicë janë gjithashtu të rritura: nafta 206 lekë dhe benzina 169 lekë, ndërsa gazi mbetet i pa ndryshuar.
Kujtojmë se qeveria trumbeton Bordin e Transparencës si masë për të kontrolluar rritjen e çmimeve. Por, sipas përvojave të mëparshme, ky Bord shërben më shumë për të diktuar çmimet në media, ku një ditë zbret, një ditë rritet, pa i dhënë kohë as punonjësit të karburantit të hipë në shkallë dhe të zbresë për të ndryshuar tabelën.
