Një ngjarje tragjike është shënuar sot në fshatin Gjormë të Kurbinit, ku një 50-vjeçar është gjetur pa shenja jete në banesën e tij. Sipas informacioneve paraprake, trupi i viktimës, identifikuar si shtetasi L. K., paraqiste shenja plagësh të shkaktuara nga armë zjarri.
Policia ka mbërritur menjëherë në vendngjarje pas njoftimit dhe ka nisur hetimet. Nga të dhënat e para hetimore, dyshohet se bëhet fjalë për një vetëvrasje me armë gjahu.
”Në fshatin Gjormë, Kurbin, në banesën e tij është gjetur pa shenja jete shtetasi L. K., 50 vjeç. Nga veprimet e para hetimore dyshohet se 50-vjeçari është vetëvrarë me armë gjahu”, thuhet shkurtimisht në njoftimin paraprak.
Grupi hetimor pret rezultatet e ekspertizës mjeko ligjore, asaj balistike dhe ndërkohë që po merren edhe dëshmitë e familjarëve për të mësuar më shumë rreth motiveve që mund ta kenë shtyrë viktimën në aktin ekstrem të dyshuar.
