Një ngjarje e rëndë familjare u parandalua në Himarë, ku një 35-vjeçar, në gjendje të rënduar psikologjike, mbajti peng prindërit e tij, 60 dhe 65 vjeç, duke i kërcënuar me thikë.
Menjëherë pas njoftimit, forcat e policisë mbërritën në vendngjarje dhe nisën negociatat me autorin. Pas më shumë se një ore përpjekjesh intensive, një efektiv lokal arriti të komunikojë drejtpërdrejt me të, duke ulur tensionin.
Gjatë ndërhyrjes, 35-vjeçari tentoi të dëmtojë veten me mjetin prerës, duke marrë plagë në zonën e barkut. Policia ndërhyri menjëherë duke neutralizuar autorin dhe duke shpëtuar prindërit pa lëndime.
Pas ngjarjes, i riu u shoqërua fillimisht në Komisariatin e Policisë Himarë dhe më pas në Vlorë, ku mori ndihmë mjekësore dhe u referua për trajtim në shërbimet psikiatrike.
