SPAK po zhvillon një operacion për ekzekutimin e 11 masave të sigurisë në kuadër të një hetimi për trafik droge dhe krim të organizuar. Mes personave të shpallur në kërkim është edhe biznesmeni Jetmir Pepa, pronar i “Pepa Group”.
Emër i njohur në botën e biznesit, por edhe një figurë e shumëpërfolur në median rozë, Pepa ka tërhequr shpesh vëmendjen për jetën luksoze, makinat e shtrenjta dhe prezencën e vazhdueshme në klubet e natës, ku jo rrallëherë është përfshirë në konflikte.
Një nga episodet më të bujshme lidhet me janarin e vitit 2025, kur gjatë një eventi për ndërrimin e viteve në një klub nate, ai u përfshi në një sherr me disa të rinj, që degradoi deri në përdorimin e armës së zjarrit, duke qëlluar në ajër dhe duke shkaktuar panik te të pranishmit.
Përtej incidenteve në jetën e natës, emri i tij është lidhur edhe me përplasje të forta në rrethin e vajzave të showbiz-it. Rasti më i komentuar ishte ai i verës 2024, kur blogerja Klea Prenga u dhunua brutalisht në një restorant në Tiranë nga motrat Mariela dhe Antonela Berisha. Sipas raportimeve, shkak i sulmit ishte dyshimi i Marielës se Prenga kishte ndërhyrë në marrëdhënien e saj me Jetmir Pepën.
Ngjarja bëri bujë të madhe, pasi u publikuan edhe dëshmitë dhe pamjet e vajzës së dhunuar, duke e kthyer konfliktin në një nga historitë më të komentuara të kronikës rozë, ku në qendër qëndronte sërish figura e Pepës dhe marrëdhëniet e tij.
Biznesmeni rezulton gjithashtu i njohur për autoritetet edhe më herët. Në vitin 2021 ai i shpëtoi një atentati në Tiranë, ndërsa vite më parë ndryshoi mbiemrin në Marashi, duke marrë atë të ish-partneres së tij Xhulia Marashit, në një lëvizje që u interpretua si përpjekje për t’iu shmangur drejtësisë.
Nga jeta luksoze dhe lidhjet e bujshme, te konfliktet në klubet e natës dhe përplasjet mes vajzave, profili i Jetmir Pepës ka qenë gjithmonë në kufirin mes showbiz-it dhe kronikës së zezë. Tashmë, me akuzat e SPAK për trafik droge dhe krim të organizuar, ai përballet me një nga çështjet më të rënda penale deri më sot.
