Muaji tetor u mbyll me një bilanc të rëndë ngjarjesh tragjike në vend, me mbi 10 raste që përfunduan me vdekje. Nga vrasja e kuzhinierit nga picieri, tek sherri me thikë në Babrru ku humbi jetën 40-vjeçari Hajdar Ismailgeci, aksidenti fatal në Vlorë ku një 17-vjeçar u përplas për vdekje nga një “Porsche”, ngjarja absurde në Berat pas një grindjeje për një kalë, deri te dy të rinjtë e vrarë në Manëz për një kafe – tetori solli një pasqyrë alarmante të dhunës dhe humbjes së jetëve njerëzore.
Ndërkohë, Ministrja e re e Brendshme dhe Policia e Shtetit e nisën muajin tetor me aksione ndaj skuterëve elektrikë, duke ndëshkuar përdoruesit e tyre në emër të “sigurisë rrugore”. Tani, në nëntor, fushata e radhës është përqendruar te parkimet e gabuara dhe zaptimi i hapësirave publike, me 10 persona të arrestuar dhe 123 të tjerë të proceduar penalisht për përdorim të paligjshëm të trotuareve e rrugëve si lavazhe apo parkime.
Një realitet që lë vend për ironi: çdo muaj, Policia duket se shpall një fushatë të re – ndërsa krimet reale vazhdojnë të ndodhin pa ndërprerje. Mbetet për t’u parë nëse nëntori do të jetë më i qetë se tetori, apo sërish fokusi do të mbetet te makinat e parkuara, ndërsa jeta e njerëzve vazhdon të humbasë në përplasje e tragjedi.
