Një aksident i rëndë ka ndodhur rreth orës 01:30 të natës në bulevardin “Ismail Qemali” në Vlorë, ku humbi jetën 17-vjeçari Leandro Shametaj. I riu, që punonte si kamarier, po kthehej nga puna kur u përplas për vdekje nga një automjet tip Porsche, që dyshohet se lëvizte me shpejtësi marramendëse, rreth 200 km në orë.
Sipas burimeve paraprake, drejtuesi i mjetit dyshohet se ka qenë në gjendje të dehur, ndërsa pas ngjarjes është shoqëruar në komisariat për verifikime të mëtejshme.
Familjarët e 17-vjeçarit janë tronditur nga ngjarja tragjike. Gjyshi i të ndjerit ka folur për mediat, duke treguar se nipi i tij ishte kthyer nga puna dhe se ende nuk janë kryer procedurat ligjore në morg.
“Më është aksidentuar djali i vajzës, jam gjyshi. Mbrëmë në 12 të natës është aksidentuar. Kemi ardhur në morgun e Vlorës, prej 8 orësh. Nuk vjen mjeku ligjor të bëjë punën. Shteti po na kthen shpinën. Nuk vjen as prokuroi dhe as mjeku ligjor. 30 policë këtu dhe nuk merr njeri masa. Një makinë na ka vrarë djalin, në bulevardin kryesor, ka ikur me 200 km/orë. Asnjë patrullë policie nuk i ka dalë përpara. Nuk më japin djalin ta shoh, nipi nuk është kriminel”, – u shpreh ai
