Zyrtari i lartë i Policisë së Shtetit Gentian Ndoi, që garoi për drejtues i Byrosë Kombëtare të Hetimit, ka vënë në lëvizje Gjykatën Administrative ku kundërshton emërimin e Joni Ketës në krye të këtij institucionit.
Këtë të enjte në Gjykatën Administrative u zhvillua dhe seanca gjyqësore, ku gjyqtarja Altina Nasufi nisi shqyrtimin e padisë së Ndoit.
Ai kërkon shfuqizimin e vendimit nr.370, të datës 19.12.2025, të Këshillit të Lartë të Prokurorisë “Për emërimin e Drejtuesit të Byrosë Kombëtare të Hetimit”.
Avokatët e Ndoit pretendojnë se akti për emërimin e Ketës është marrë në kundërshtim me ligjin e për rrjedhojë duhet konstatuar absolutisht i pavlefshëm.
Ai kërkon nga Administrative që të urdhërojë Komisionin e Përzgjedhjes pranë Prokurorisë së Posaçme të përbërë nga Altin Dumani, Arben Kraja dhe Behar Dibra që të përcjellin për emërim për Drejtorin e Byrosë Kombëtare të Hetimit, kandidatin që ka marrë më shumë pikë në garën e zhvilluar, z. Gentian Ndoi.
Ndoi ishte një nga kandidatët në garë për të marrë drejtimin e BKH-së dhe u rendit i pari. Por KLP mbi bazën e propozimit të komisionit pranë SPAK emëroi në këtë detyrë Joni Ketën.
