Një ndërtim pa leje në një hapësirë plazhi në lagjen nr. 1 të Sarandës ka çuar në arrestimin dhe pezullimin e disa punonjësve të Policisë së Shtetit, mes tyre edhe shefi i Komisariatit të Policisë Sarandë.
Sipas njoftimit zyrtar të Policisë së Shtetit, pas informacioneve të mbërritura në Drejtorinë e Përgjithshme të Policisë për një objekt me disa struktura, një pjesë e të cilave të ndërtuara në ujë, në terren u konstatuan punime të paligjshme ndërtimi.
Për rastin, Drejtoria Vendore e Policisë Vlorë arrestoi në flagrancë 8 persona që punonin në objekt, ndërsa u shpall në kërkim shtetasja që posedonte hapësirën e plazhit dhe për llogari të së cilës dyshohet se po kryheshin ndërtimet pa leje.
Pas ndërhyrjes së Policisë së Shtetit, në terren u angazhuan edhe IKMT, IMT dhe Policia Bashkiake, të cilat kryen prishjen e ndërtimeve.
Ndërkohë, hetimet u zgjeruan edhe ndaj efektivëve të policisë që dyshohet se nuk kishin marrë masa për të ndaluar paligjshmërinë.
Në bashkëpunim me Agjencinë e Mbikëqyrjes Policore dhe Prokurorinë e Sarandës, u bë ndalimi i:
Komisar Gëzim Bashllari, shef i Komisariatit të Policisë Sarandë;
Nënkomisar Andi Duro, specialist për hetimin e krimeve;
Nënkomisar Ajdin Ismailaj, specialist për rendin;
Inspektor Robert Çullaj, specialist zone.
Sipas Policisë së Shtetit, ndaj tyre rëndojnë dyshime për veprat penale:
“Shpërdorim detyre”,
“Kryerja e veprimeve arbitrare”,
dhe “Mosmarrja e masave për të ndërprerë gjendjen e paligjshme”.
Autoritetet dyshojnë se shkeljet nuk lidhen vetëm me këtë rast.
Pas ndalimeve, Drejtori i Përgjithshëm i Policisë së Shtetit, Drejtues Madhor Skënder Hita, ka urdhëruar pezullimin e menjëhershëm nga detyra të katër efektivëve, ndërsa Drejtoria e Standardeve Profesionale ka nisur procedurat për përjashtimin e tyre nga Policia e Shtetit.
Po ashtu është pezulluar edhe shefi i Seksionit për Hetimin e Krimeve në Volum në Komisariatin e Policisë Sarandë, Komisar Blerim Tafçiu, pasi sipas Policisë nuk është paraqitur për t’u marrë në pyetje gjatë veprimeve hetimore të AMP-së.
