Naftëtarët e e Bankers Petroleum të organizuar nga sindikata përfaqësuese, protestuan sërish sot duke kërkuar që të mos zgjatet kontrata aktuale e kompanisë pa u nënshkruar më parë një marrëveshje e re që garanton të drejtat e tyre.
Me pankarta në duar dhe thirrje për më shumë transparencë, protestuesit paralajmëruan se janë të gatshëm të ndërpresin punën nëse kërkesat e tyre nuk merren parasysh.
“Greva do të thotë se ne nuk punojmë më dhe kryqëzojmë duart. Ju kërkoni kontratë nga shteti, doni të zgjasi abonimi i kësaj kompanie, por nuk do ta keni. Të jeni të sigurt se nuk do të ketë asnjë kontratë më. Ajo mund të na jepet vetëm neve. Duhet një marrëveshje e re me ne”, u shprehën naftëtarët gjatë protestës.
Sipas tyre, mungesa e transparencës mbi kontratat ekzistuese dhe heshtja institucionale lidhur me marrëveshjen e ardhshme, po i shtyn drejt grevës së përgjithshme.
Aktualisht, nuk ka pasur asnjë reagim publik nga kompania Bankers Petroleum. Ndërkohë, sindikata ka paralajmëruar se greva do të përshkallëzohet në ditët në vijim nëse nuk ndërmerret asnjë veprim konkret nga autoritetet apo kompania.
