Situata e motit të keq në disa qarqe të vendit vijon të jetë alarmante. Reshjet intensive të shiut dhe erërat e forta kanë shkaktuar përmbytje, rrëshqitje dherash, dëmtime të infrastrukturës rrugore dhe ndërprerje të energjisë elektrike në dhjetëra fshatra, duke izoluar disa zona dhe vënë në rrezik banesat dhe bagëtitë e banorëve.
Situata e krijuar në qarkun e Lezhës mbetet problematike, sidomos në Njësitë Administrative Mamurras dhe Milot në Kurbin, ku uji ka tërhequr nga disa zona, por pasojat janë të konsiderueshme për pronat dhe infrastrukturën. Në Bashkinë Mirditë, disa zona vazhdojnë të jenë të izoluara për shkak të rrëshqitjeve të dheut dhe dëmtimit të rrugëve. Fshatrat Shengjergj dhe Klos në Njësinë Administrative Fan janë bllokuar plotësisht, ndërsa rruga kryesore e Kurbneshit është e mbyllur. Probleme ka gjithashtu në Orosh, Kaçinar dhe në Rrëshen, ku është shembur ura që lidh fshatin Jezull me rrugën kryesore.
Katër familje janë evakuar në Delvinë dhe dy në Finiq, pasi uji në banesa shkoi në 50 cm.
Në qarkun e Elbasanit, dhjetëra fshatra vijojnë të jenë pa energji elektrike, ndërsa akset rrugore kanë pësuar dëmtime nga gurë, pemë dhe aluvione. Në Memaliaj, niveli i lumit Vjosë ka arritur 6 metra, duke rrezikuar përmbytje, ndërsa banorët këshillohen të evakuojnë bagëtitë. Në Gramsh, lumi në fshatin Kërpicë kërcënon disa banesa, dhe autoritetet kanë dërguar fadroma dhe zjarrfikës për ndërhyrje emergjente.
