Një grup minatorësh u mblodhën sot para godinës së Kuvendi të Shqipërisë, për të protestuar për atë që e cilësojnë si trajtim të padrejtë në përfitimin e pensioneve dhe mungesën e mbështetjes institucionale për kategorinë e tyre.
Protestuesit shprehën pakënaqësi për pensionet e pjesshme që, sipas tyre, nuk reflektojnë vështirësinë dhe rrezikshmërinë e punës në miniera. Ata kërkuan miratimin e një statusi të posaçëm për minatorët, si dhe përfitime shtesë që lidhen me natyrën e punës së tyre.
“Ne nuk marrim pension të plotë dhe nuk kemi përfituar asnjëherë nga benefite që i takojnë kësaj kategorie. Kërkojmë statut dhe mbështetje konkrete”, u shprehën disa prej protestuesve gjatë tubimit.
Minatorët theksuan gjithashtu se ndër vite nuk kanë pasur një sindikatë funksionale që të mbrojë të drejtat e tyre, çka sipas tyre ka ndikuar në mungesën e përfaqësimit dhe zgjidhjes së problematikave.
Gjatë protestës, ata i bënë thirrje deputetëve dhe mediave që të vizitojnë nga afër vendet e tyre të punës për të parë kushtet në të cilat operojnë.
