Në Gjykatën e Posaçme u hodh shorti elektronik dhe u përcaktua treshja gjykuese që do të shqyrtojë akuzat penale ndaj ish-presidentit Ilir Metaj dhe ish-bashkëshortes së tij Monika Kryemadhi.
Erjon Bani, Rudina Palloj dhe Marinela Osmani, janë gjyqtarët që u përzgjodhën nga shorti dhe pritet të caktojnë datën për nisjen e gjykimit.
Ky zhvillim vjen pasi më herët, treshja gjykuese e kryesuar nga Etleva Deda pranoi kërkesën e tre të pandehurve, Fatime Kryemadhi, Ema Çoku dhe Piro Xhixha, për gjykim të shkurtuar. Sipas ligjit, trupa vijoi me shqyrtimin e çështjes për 3 të pandehurit e parë, ndërsa u nda dosja Metaj-Kryemadhi. Ish-çifti i bashkëshortëve akuzohen për korrupsion, pastrim parash e fshehje pasurie.
