Në Gjykatën e Assiseve të Brukselit vijoi këtë të enjte gjyqi ndaj nëntë personave të akuzuar për vrasjen e Ardit Spahiut, e ndodhur më 27 nëntor 2020 në Molenbeek.
Gjatë seancës, disa dëshmitarë u paraqitën para trupit gjykues. Partnerja aktuale e Franc Gergely, i njohur si “Copja” dhe i dyshuar si porositës i vrasjes, dëshmoi përmes videokonferencës nga Emiratet e Bashkuara Arabe. Ajo e përshkroi të akuzuarin si një njeri besnik dhe “kurrë agresiv”, duke theksuar se nuk kishte dijeni për ndonjë aktivitet kriminal dhe duke deklaruar se ai është i pafajshëm.
Më herët, një dëshmitar shqiptar me origjinë nga Elbasani deklaroi se njihte familjet Alibej dhe Copja, të cilat sipas tij janë në konflikt prej disa vitesh. Ai u pyet nga kryetarja e trupit gjykues për një përleshje të ndodhur në vitin 2017 në Elbasan, ku dyshohet se ishte i përfshirë Franc Gergely. Dëshmitari e cilësoi ngjarjen si një sherr të vogël, por më pas pranoi se gjatë incidentit ishin përdorur armë zjarri, siç ishte raportuar edhe nga mediat shqiptare. Ai gjithashtu pretendoi se një pjesë e dëshmisë së dhënë më herët nga një anëtar i familjes Alibej ishte e pavërtetë.
Në seancën e paradites dëshmoi edhe një ekspert i ADN-së, i cili sqaroi se në vendin e ngjarjes nuk ishte gjetur asnjë gjurmë tjetër biologjike, përveç ADN-së së viktimës Ardit Spahiu dhe të drejtuesit të automjetit ku ai ndodhej pak para vrasjes.
