Ministria e Mjedisit duket se ende nuk ka gjetur një zgjidhje se ku do t’i asgjesojë mbetjet e rrezikshme të Kurum që ndodhen në Durrës.
Këtë e la të kuptohet ministri i Mjedisit, Sofjan Jaupaj, i cili tregoi dy mënyra për asgjësimin e tyre, por që ende nuk ka një përcaktim të saktë se kur mund të veprohet.
“E para, nëse do të vlerësohet se do të ketë një eksport të këtyre mbetjeve, për t’u asgjësuar në subjekte të huaja, Ministria e Mjedisit do të angazhohet me Agjencinë e Administrimit të Pasurive të Sekuestruara dhe Konfiskuara për të plotësuar të gjithë dokumentacionin ligjor për ta kryer këtë proces. E dyta, nëse në vlerësimin e ekspertëve do të duhet që këto mbetje të asgjësohen në territorin e Shqipërisë, Ministria është e gatshme të japë mbështetjen e saj”, tha ai.
Pra, bazuar në deklaratën e Jaupajt, kuptohet se ministrisë i duhet ende kohë, pasi ndodhet më shumë në fazën e opsioneve sesa në atë të një plani konkret veprimi. Kjo vonesë vjen në një moment kur ekspertët kanë bërë thirrje publike për veprime të menjëhershme, duke paralajmëruar se mbajtja e mbetjeve në kontenierë përbën një rrezik për shëndetin e qytetarëve dhe për mjedisin.
