Pas aksidentit të rëndë rrugor në aksin Sarandë–Delvinë, ku humbën jetën dy motrat Rozina dhe Ela Dhimaku, ndërsa mbeti e plagosur rëndë Antonela Zhupa, Gjykata e Sarandës ka caktuar masën e sigurisë për drejtuesin e automjetit që shkaktoi tragjedinë, 23-vjeçarin Kevin Norra.
Seanca u zhvillua paraditen e së hënës në ambientet e gjykatës. Prokurorja e çështjes, Besjana Sadikaj, kërkoi masën e sigurisë “arrest me burg”, duke theksuar rrezikshmërinë e lartë të veprimit dhe faktin se ngjarja ka pasur pasoja të rënda për jetën e qytetarëve. Kërkesa u pranua nga trupi gjykues.
Norra u ndalua menjëherë pas aksidentit tragjik të ndodhur mbrëmjen e së dielës. Sipas burimeve të Policisë Rrugore, ai drejtonte automjetin në gjendje të dehur dhe ka kryer një parakalim të gabuar, duke humbur kontrollin e mjetit dhe shkaktuar përplasjen fatale.
Ngjarja ka tronditur qytetin e Sarandës dhe mbarë opinionin publik, ndërsa familja Dhimaku është në zi për humbjen e dy vajzave të reja. Ndërkohë, e plagosura Antonela Zhupa ndodhet nën kujdesin e mjekëve, me gjendjen shëndetësore ende të rëndë.
Hetimet për aksidentin vijojnë, ndërsa drejtuesi i mjetit pritet të përballet me akuza të rënda për shkelje të rregullave të qarkullimit rrugor dhe drejtim mjeti në gjendje të dehur që solli pasojë vdekjen e më shumë se një personi.
