Gjykata e Apelit të Posaçëm la në fuqi vendimin e Gjykatës së Posaçme duke dënuar me burgim të përjetshëm Fran Marashin, një nga autorët e masakrës së Urës Vajgurore.
Masakra ndodhi në Urën Vajgurore pas një mitingu të Partisë Socialiste, teksa forcat e policisë ktheheshin në Berat u qëlluan me armë nga vila e Protoduarëve.
Për pasojë u vranë dhe dogjën në autoblind policët Miltiadh Koçi, Arjan Shemuni, Asllan Selami dhe Ilia Bano si u plagosën Thimi Tanku dhe Ylli Dhamo. I vrarë mbeti edhe qytetari Ilir Bani. Për masakrën e Urës Vajgurore janë dënuar me burgim të përjetshëm Musa Protoduari dhe Shkëlqim Protoduari, Fatbardha Protoduari me 25 vjet burg, si dhe janë dënuar po ashtu edhe Sokol Ndreu, Gjovalin Ndreu, Preng Miri dhe Gjelosh Miri.
Komunikim për mediat
Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Daniela Shirka (kryesuese), Florjan Kalaja (anëtar) dhe Miliana Muça (anëtare), sot më datë 26.09.2025, shpalli vendimin mbi çështjen penale nr. 61 akti, datë 23.07.2025 regjistrimi, mbi ankimin e të pandehurit/ankues F.M., ndaj vendimit nr. 21, datë 10.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi:
1. Lënien në fuqi të vendimit nr. 21, datë 10.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar.
2. Ndreqjen e gabimeve materiale të vendimit nr. 21, datë 10.03.2025 të Gjykatës së Posaçme të Shkallës së Parë për Korrupsionin dhe Krimin e Organizuar, duke saktësuar gjeneralitet e viktimave si vijon: I.N. (I.B.), M.K., A.Sh., A.S., I.B.
3. Shpenzimet e gjykimit në apel i ngarkohen të pandehurit F.M.
