Agjencia e Administrimit të Pasurive të Sekuestruara dhe të Konfiskuara (AAPSK) ka publikuar katalogun e përditësuar të mjeteve të sekuestruara dhe të konfiskuara. Bëhet fjalë për automjete luksoze Lamborghini, Porsche apo Lexus, që iu janë sekuestruar bossëve të narkotrafikut apo njerëzve të botës së krimit.
“Katalogu i mjeteve përfshin një gamë të gjerë automjetesh dhe mjetesh të tjera, të ndara sipas statusit ligjor – mjete të sekuestruara dhe mjete të konfiskuara – për secilën prej të cilave paraqiten të dhëna të detajuara mbi bazën ligjore të sekuestrimit apo konfiskimit, përshkrimin teknik, vitin e prodhimit, si dhe vlerën e përafërt të pasurisë. Dokumenti përfshin si automjete të përdorimit të përditshëm, ashtu edhe mjete me vlerë më të lartë tregu, duke reflektuar diversitetin e pasurive të administruara nga agjencia”, njoftoi Agjencia.
Pak ditë më parë VNA raportoi se automjetet luksoze të Ervis Martinaj, mbretit të bixhozit të zhdukur pa gjurmë apo personazheve të tjera të njohur të botës së krimit u janë dhënë në përdorim bashkive në rrethe të ndryshme të vendit, vetë BKH-së apo institucioneve të tjera qendrore vendore e qendrore.
