Dega holandeze e markës së njohur të luksit Louis Vuitton (Louis Vuitton BV) është gjobitur me 500 mijë euro nga Prokuroria Publike për shkelje të Aktit për Parandalimin e Pastrimit të Parave dhe Financimin e Terrorizmit (Wwft). Vendimi vjen pas një hetimi të gjerë për pastrim parash, i cili zbuloi mangësi në verifikimin e klientëve që kryenin blerje të mëdha dhe të përsëritura me para në dorë.
Sipas autoriteteve, kompania nuk kishte kontrolluar siç duhet identitetet e klientëve që realizonin transaksione të konsiderueshme cash për një periudhë të zgjatur. Çështja u zgjidh me një urdhër penal, me qëllim shmangien e një procesi të gjatë gjyqësor në Gjykatën e Qarkut të Roterdamit.
Skema e dyshuar e pastrimit të parave
Hetimi lidhet me një rrjet të gjerë pastrimi parash, ku në qendër qëndron 55-vjeçari shqiptar nga Saranda, Thanas Bako, i dënuar në shtator 2024 me 7 vite burg nga një gjykatë në Roterdam për përfshirje në forma të rënda të krimit të organizuar. Sipas prokurorëve, një grua 36-vjeçare nga Lelystad, e identifikuar si Bei W., ka shpenzuar mbi 2 milionë euro fonde të paligjshme në periudhën gusht 2021 – shkurt 2023, duke blerë produkte luksoze në disa dyqane në Holandë, përfshirë Louis Vuitton. Ajo dyshohet se përdorte pseudonime dhe adresa të ndryshme email-i për të fshehur identitetin dhe për të shmangur raportimin e detyrueshëm financiar.
Autoritetet thonë se mallrat luksoze, kryesisht çanta të markave të njohura, dërgoheshin në Kinë për t’u rishitur, duke maskuar kështu origjinën e paligjshme të parave. Kjo metodë njihet si tregtia “Daigou”, një praktikë që përdoret për të transferuar vlera monetare përmes produkteve të luksit. Provat e mbledhura përfshijnë mesazhe komunikimi, fatura dhe pamje nga kamerat e sigurisë. Në banesën e gruas u gjetën gjithashtu kuti të përgatitura për dërgesa jashtë vendit.
Dyshime për përfshirje të brendshme
Në hetim është përfshirë edhe një ish-asistente shitjesh e Louis Vuitton, e cila dyshohet se ka ndihmuar gruan duke e njoftuar për mbërritjet e produkteve të reja dhe duke e këshilluar si të ndante blerjet për të mos kaluar pragun prej 10 mijë eurosh, që aktivizon raportimin në Njësinë e Inteligjencës Financiare (FIU).
Nga 1 janari 2026, ligji holandez do të ndalojë pagesat cash mbi 3 mijë euro. Prokuroria thekson se markat e luksit kanë detyrime të njëjta me institucionet financiare për verifikimin e klientëve sipas rregullave kundër pastrimit të parave. Ndërkohë, procesi gjyqësor ndaj gruas 36-vjeçare, ish-punonjëses së dyshuar dhe një personi të tretë vijon në Gjykatën e Qarkut të Roterdamit.
Kush është Thanas Bako?
Thanas Bako konsiderohet nga autoritetet evropiane si një nga figurat kyçe të pastrimit ndërkombëtar të parave. Ai u arrestua në Athinë më 31 maj 2023 me kërkesë të Holandës dhe më pas u ekstradua. Sipas hetimeve, në periudhën qershor 2020 – mars 2021, rrjeti i tij ka lëvizur rreth 246 milionë euro për organizata kriminale. Bako dyshohet se drejtonte një “bankë nëntokësore” me dy magazina në Wateringen dhe Nieuw-Vennep, ku paratë numëroheshin dhe ruheshin. Rrjeti përbëhej nga korrierë që punonin si hidraulikë, marangozë apo pastrues xhamash, me precedentë penalë të pastër për të shmangur dyshimet.
Komunikimet mes anëtarëve të rrjetit zhvilloheshin përmes aplikacionit të koduar ANOM, i zbuluar nga hetime ndërkombëtare. Sipas dokumenteve gjyqësore, për çdo transport prej 1 milion eurosh, korrierët përfitonin rreth 0.2% komision.
Një nga episodet më të rënda të hetimit lidhet me një ngjarje të 23 shkurtit 2021, kur dy korrierë të rrjetit u morën peng në një magazinë që shërbente si pikë grumbullimi parash. Autoritetet zbuluan më pas se në këtë ambient ishin numëruar mbi 165 milionë euro, të ndara në rreth 200 transaksione. Sipas Prokurorisë, hetimi ndaj Bakos dhe bashkëpunëtorëve të tij zbuloi një strukturë të organizuar mirë, që funksiononte si sistem paralel bankar për qarkullimin e parave të paligjshme në Evropë.
