Gazetarja Klodiana Lala ka deklaruar se afera “5D” e Bashkisë së Tiranës është “shfryrë plotësisht”, ndërsa zyrtarët e përfshirë kanë përfituar dënime minimale dhe kanë shmangur burgun, pavarësisht akuzave të rënda dhe dëmit financiar.
E ftuar në emisionin “Të Paekspozuarit” në MCN TV, Lala tha se procesi i zbutjes së dosjes nisi me ndryshimin e masave të sigurisë për Redi Mollën dhe Taulant Tushën, të cilët ndodhen në arrest shtëpie.
"Shfryrja e ‘aferës 5D’ ka nisur që me lirimin në arrest shtëpie për Redi Mollën, i cili akuzohet për korrupsion, pastrim parash dhe fshehje pasurish. Ka dyshime se Molla dhe Qato kishin krijuar kompaninë 5D dhe e ushqenin me tendera nga Bashkia e Tiranës,” tha Lala.
Ajo theksoi se pavarësisht akuzave që parashikojnë dënime deri në 15 vite burg, masat ndaj Mollës dhe Tushës janë zbutur pa transparencë.
“Ende nuk ka vendim të arsyetuar pse këta persona, me akuza të rënda, mbahen në arrest shtëpie,” u shpreh ajo.
Lala kritikoi gjithashtu vendimin e Gjykatës së Posaçme të Apelit, e cila hoqi dënimin me burg për disa zyrtarë, përfshirë Eglantina Zeren, ish-drejtuese e ‘Tirana Parking’.
“Shkalla e parë i kishte dënuar me 6 deri në 9 muaj burg. Ishin dënime qesharake, por të paktën me burg. Apeli sot e hoqi burgimin dhe i kaloi në shërbim prove për 12 muaj,” tha gazetarja.
Sipas saj, pavarësisht se “janë zhvatur miliona euro”, asnjë zyrtar nuk ka vuajtur dënim me burg.
“Është një dënim qesharak në raport me aferën që ka ndodhur. Kjo është shfryrje totale e aferës 5D dhe duhej të kishte edhe hetime pasurore për zyrtarët,” përfundoi Lala.
