Gjykata Kushtetuese mori më shumë kohë për të shpallur një vendim lidhur me pagat e gjyqtarëve. Tetë gjyqtarët kushtetues u mblodhën në dhomën e këshillimit, por pas dy orë diskutimesh ndanë qëndrimin se iu duhet më shumë kohë për ta shqyrtuar çështjen, pasi e konsiderojnë komplekse.
Shoqata Kombëtare dhe Unioni i Gjyqtarëve vunë në lëvizje Gjykatën Kushtetuese duke pretenduar se me ndryshimet ligjore të 2023, ku paga e tyre referohet tek ajo e presidentit të Republikës, iu janë cenuar të drejtat. Ata pretendojnë se paga e tyre duhet të referohet tek ajo e drejtorit të Përgjithshëm në Kryeministri sikurse u parashikua në ndryshimet ligjore të 2016 në kuadër të reformës në Drejtësi. Magjistratët pretendojnë se kjo është një e drejtë që ua garanton Kushtetuta.
Kryeministri Edi Rama thotë se gjyqtarët po tregojnë papërgjegjshmëri duke kërkuar rritje të pagave, çka do ta rëndonte faturën e buxhetit të shtetit me 37 mln euro në vit.
