Debati në Këshillin e Mandateve për kërkesën e SPAK ndaj Belinda Ballukut është shoqëruar me pyetje të drejtpërdrejta nga deputeti Ulsi Manja, drejtuar prokurorëve të çështjes.
Manja kërkoi sqarime mbi pretendimet e prokurorisë se Balluku, drejtpërdrejt ose përmes palëve të tjera, ka kërcënuar persona të lidhur me hetimin.
“Këta që janë kërcënuar janë dëshmitarë apo të pandehur?” – pyeti Manja.
Përfaqësuesit e SPAK u përgjigjën se bëhet fjalë si për persona të pandehur të tjerë, ashtu edhe për dëshmitarë që nuk janë nën hetim.
Manja vijoi me një tjetër pyetje: “A janë sekuestruar të gjitha provat?”
Prokuroria u përgjigj shkurt: “Jo.”
Në vijim, anëtari i Këshillit kërkoi të dijë se cili është mekanizmi përmes të cilit Balluku mund të prishë provat, duke qenë – sipas tij – e pezulluar nga detyra.
Prokurori u përgjigj se Balluku është ende në detyrë dhe se mekanizmi i mundshëm konsiston në takime me vartësit.
Seanca në Këshillin e Mandateve po vijon mes debatesh, ndërsa kërkesa e SPAK për autorizim për masë më të rëndë sigurie ndaj Ballukut pritet të kalojë më pas për votim në Kuvend.
