Në një dokument prej mbi 170 faqesh, që supozohet të jetë pasqyra e shëndetit të drejtësisë shqiptare për vitin 2025, Këshilli i Lartë Gjyqësor (KLGJ) ka arritur një rekord të ri: të flasë gjatë pa thënë asgjë për atë që e kërcënon sistemin më shumë se çdo gjë tjetër, presionin politik. Ndërkohë që viti 2025 u karakterizua nga retorika të ashpra, sulme direkte ndaj trupës gjyqësore dhe etiketime politike nga të dyja krahët e politikës, KLGJ ka zgjedhur "politikën e strucit".
Ndryshe nga SPAK-u apo shoqatat e gjyqtarëve, të cilat në raportimet e tyre e vënë theksin te rreziku i intimidimit të gjyqtarëve, KLGJ mjaftohet me vetëm katër deklarata për shtyp në mbrojtje të dinjitetit të gjyqtarëve gjatë gjithë vitit, të cilat i klasifikon si reagime ndaj "sulmeve mediatike", duke e anashkaluar plotësisht burimin politik të këtyre sulmeve.
Ky raport dëshmon një institucion që është më shumë i shqetësuar për "sigurinë kibernetike" dhe "arkivimin e fletëve" sesa për integritetin e gjyqtarëve përballë presioneve që vijnë nga zyrat e pushtetit.
Ndërsa politika shqiptare tundte themelet e gjykatave, nga sulmi nominal që ju bënte Rama gjyqtarëve, tek deklaratat e egra të Berishës për ta, Këshilli i Lartë Gjyqësor nuk e sheh të arsyeshme, që të kërkojë vëmendjen e Kuvendit.
KLGJ raporton me krenari se janë digjitalizuar saktësisht 12,937,316 fletë. Duket se numërimi i çdo letre është prioritet më i lartë se numërimi i sulmeve politike që synojnë të diktojnë se çfarë shkruhet në ato letra.
KLGJ ankohet se nga 9.3 miliardë lekë të kërkuara, iu dhanë "vetëm" 6.8 miliardë. Një dramë e vërtetë financiare që me sa duket e bën të pamundur blerjen e një lapsi me të cilin mund të shkruhej fjala "presion politik" në raport.
Institucioni shqetësohet për hakerat që mund të vjedhin të dhënat, ndërkohë që "hakerat" e vërtetë të sistemit, politikanët që hyjnë në proceset gjyqësore përmes ekraneve dhe deklaratave publike, nuk konsiderohen as si virus e as si malware.
Raporti është i mbushur me terma si "treguesi WR", "treguesi CR" dhe "treguesi DT". KLGJ preferon të flasë në gjuhën e kodeve teknike evropiane, ku nuk ka nevojë të përkthehet asnjëherë termi "shantazh politik".
