Sot, data 8 tetor është afati i fundit për prokurorët e SPAK që të paraqesin kandidaturat për të marrë frerët e institucionit pas përfundimit të mandatit të Altin Dumanit. Burime pranë Këshillit të Lartë të Prokurorisë bëjnë me dije se deri më tani kanë shprehur interes prokurorët Klodian Braho që ka hetuar dosjen 5D apo Toyota Auris, Adnand Xholi që ka hetuar bossë të krimit dhe ka goditur disa organizata kriminale, si dhe Elvin Gokaj që ka hetuar kryesisht çështje që lidhen me ish-zyrtarët e lartë, siç është dosja Buka sha me të pandehur ish-zëvendëskryeministrin Arben Ahmetaj. Në garë për herë të parë për mandatin e tretë për kreun e SPAK është edhe një grua, Doloreza Musabelliu, e pagëzuar si “gruaja e hekurt”.
Musabelliu ka hetuar organizatën më të rrezikshme kriminale të drejtuar nga vëllezërit Franc e Hajdar Çopja, ndërsa ishte në shënjestër për t’u vrarë nga Laert Haxhiu i bandës së Lushnjes. Deri në përfundim të orarit zyrtar mund të ketë të tjerë kandidatë në garë. Altin Dumani e dorëzon stafetën në mes të dhjetorit 2025.
