Kryetari i Gjykatës së Lartë, Sokol Sadushi, ka ngritur sot shqetësime serioze mbi mënyrën se si po hartohet Kodi i ri Penal, duke e cilësuar procesin “të paqartë, të pabalancuar në filozofi dhe të pamjaftueshëm në metodologji”.
Sipas Sadushit, draftimi i Kodit nuk është mbështetur mbi një metodologji të qartë dhe mungon një dokument orientues që të përcaktojë filozofinë e re të drejtësisë penale. Ai theksoi se konsultimi institucional ka qenë i pjesshëm dhe se, pavarësisht volumit dhe disa risive, drafti aktual rrezikon të mos thjeshtojë sistemin penal, por ta bëjë më të vështirë në zbatim.
“Ky qëndrim, sado kritik, nuk është kundërshtim i reformës, por detyrim profesional e moral, sepse drejtësia nuk matet me shpejtësinë e miratimit të ligjeve, por me cilësinë e mendimit që i shoqëron ato,” tha ai në konferencë.
Sadushi njoftoi se Gjykata e Lartë ka kryer një analizë të detajuar prej rreth 50 faqesh, me vërejtje dhe propozime konkrete për përmirësimin e projektit, e hartuar nga trupa gjyqësore dhe e miratuar nga Mbledhja e Përgjithshme e gjyqtarëve. Dokumenti i është dorëzuar zyrtarisht Ministrisë së Drejtësisë dhe grupit të punës për rishikim.
Duke e cilësuar Kodin Penal si aktin më të rëndësishëm pas Kushtetutës, Sadushi kërkoi që reforma të ndërtohet mbi transparencë, përfshirje të ekspertëve dhe një vizion të qartë ligjor, për t’u siguruar që ndryshimet të forcojnë zbatimin e drejtësisë dhe besimin e qytetarëve tek ligji.
